【一索得男】方皓玟5月荣陞人妻宣布怀孕:感谢上天给我的礼物

时间：6年前 (2018-02-07)来源：怀孕期阅读量: 851

导读：

2017年倒數最後幾日，又再傳來好消息，現年37歲嘅方皓玟，出道15年以來一直以唱作人身份默默耕耘，直至2016年憑住《你是你本身的傳奇》橫掃各大樂壇頒獎禮，音樂事業開始起飛。今年5月下嫁日籍模特兒男友安田慎吾，估唔到事隔半年就有好消息，佢喺12月27號早上，上載一張超聲波照宣布造人成功：「感謝上天給我的禮物，it’s a boy :)」一索得男真係可喜可賀﹗

12月27日早上，方皓玟上載超聲波照宣布一索得男。(方皓玟Facebook)

方皓玟（Charmaine）年中正式成為人妻，不過音樂事業並未因此而停頓，今年佢推出4首新歌，當中《假使世界原來不像你預期》MV已經破百萬點擊率，並入圍叱咤頒獎禮我最喜愛的歌曲最後10強，有望延續《你是你本身的傳奇》橫掃頒獎禮嘅氣勢。

《叱咤樂壇流行榜頒獎典禮2016》中，方皓玟得到唱作人銀獎時致詞相當感人。(影片截圖)

近年方皓玟愈戰愈勇，成為頒獎禮常客。(方皓玟Facebook)

《叱咤樂壇流行榜頒獎典禮2016》中，方皓玟得到唱作人銀獎時強忍眼淚說：「可能大家唔知道究竟呢個獎對一個唱作人有幾重要，我係嚟自一間好細嘅唱片公司，全公司夾埋我得3個人，我係公司唯一嘅歌手。我間公司雖然細，但我有嘅愛係好多！」

10月初舉行音樂會時，方皓玟仍大騷小蠻腰。(方皓玟Facebook)

12月27號早上，Charmaine上載一張超聲波照宣布造人成功：「感謝上天給我的禮物，it's a boy :)」有BB當然值得開心，但睇番轉頭就覺得有啲牙煙啦，事關要照超聲波知道BB性別，最快都要懷孕３個月以上，Charmaine呢幾個月嘅工作一直無停過，10月時舉行個人音樂會仲著吊帶背心露出小蠻腰，11月尾出席音樂會時仲著上5吋高踭鞋出席活動，計返轉頭當時已經有孕在身，大肚婆要事事小心之後唔好再貪靚著到咁高啦！